Na tuputupu a’e Mona i se aiga e sili ona latalata ile Atua. O le galuega matua a Miriama lona tinā le fa’amatala o tala ole Tusi Paia i si ana tama mai lava i lona ititi, ae e tulimata’i lava le ali’i lenei ile taimi e mānava mai ai lona tamā o Ieremia se’i o la usu fa’atasi le pese e fiafia ai lava, o “Iesu le uo a tamaiti”. Tigā le lelavā o Mona i taeao ta’itasi, ua avea lava ma masaniga le ala usu e fafagu ona mātua. “Tinā, tamā, nonofo i luga e vili Iesu tatou te talanoa ai ua leva ona fa’atali mai”. E fa’aigoa lava e Mona le tatalo o lana telefoni e vili ai i’a Iesu i taeao ma afiafi. A o’o i taeao o Sāpati, ole masani a le ali’i lenei ole mo’emo’ena’o ia ile falesā, ona tūtū lea ile faitotoa ole malumalu ma fa’atalitali a’o ō atu tagata ole ekalesia ona fa’atalofa lea iai.
O se faamanuiaga tele ile ekalasia le iai o se tamaititi e pei o Mona e mata’u ile Atua ma ava i so’o se tasi. I lona aiga, o se mitamitaga i ona matua le iai o se tagata e faamalosia i la’ua ile galuega a le Ali’i ma fesoasoani e tausoa faatasi le mamafa ole galuega a’o avea ai i laua ma taitai ole ekalesia. O se aiga e maualalo lona fa’avaeina ile oa, peitai e fa’atumuina ile Agaga ole Atua. Ole mafua’aga foi lena e manuia ai lava taumafaiga a Mona ile aoga.
Ua gasolo pea le faigamalaga a le aiga ma ua oo ina avea Mona ma talavou, ua atoa lona 21 tausaga. Ua toe nei o ia ma si ona tinā, ina ua fa’afuasei ona āfaina lona tamā i se fa’alavelave tau ta’avale ma uma ai lona ola. Ole taimi lea, ua amata ona va’aia suiga ile olaga o Mona.
Ua alu i tāiga a le tupulaga ole nu’u, ma ua tau le maua se taimi i lona aiga. Ua inu ava malosi ma ua filifili e nofo ma le aoga, ua fiu ai foi si ona tinā ua amata ona tali upu.
Ole vaega ole olaga o Mona na sili ona manu’a ai le loto o Miriama si ona tinā, ua fulitua Mona ile Atua. Ua le toe maua se taimi e tatalo ai, mou le fia pese i taimi o faigalotu, ua o’o lava foi ile Sāpati ua fai ma aso inu ava malosi ole alii, ae ua ia faamata’u foi isi ona tina pe a fautua atu iai.
Ua fuafua nei le keni lea olo’o iai Mona, e malaga i Amerika e fa’amautū ai la latou osofaiga. O se keni e fefefe uma iai le augatupulaga ole nu’u aua e faaaupegaina, ma malosi i fuala’au fa’asāina. Ae filo atu ai ma le talavou na tapu’eina i ala ole fa’akerisiano.
Ole vaiaso atoa lava na tapena ai le faigamalaga, na tagi toatuli ai Miriama le tinā ile Atua seia toe fa’afoi Mona ile tagata na ia filifilia e auauna mo Ia. Na fiafia Miriama ina ua faalogo atu ua leiloa le tupe na tu’u e fai ai le tusi folau o Mona. Peitai, na alu lava le osofaiga a Mona ile faleoloa a le tuaoi ma maua mai ai se seleni telē lava. Ua o’o nei ina faia le tusi folau peitai na leiloa lava ile aso lena. Ua iloa lelei e le tinā, o auala ia a le Atua ua galue mai ai.
E lei fa’avaivai lava Mona peitai na toe fai lona tusi folau fou ma totogi lona pasese ma mea uma talu le fia alu ile malaga a lana vāega ile atunuu e maua ai mea e tele e ala i a latou osofaiga fa’asolitulafono.
Ua o’o nei ile aso e tu’uva’a ai le aumalaga. E ala ane Mona ua tuai. Tulituli atu le va’a peitai e taunu’u atu ile malaeva’alele ua alu ese le va’a. Ua faitio le talavou ile Atua ma faapea ana upu, “Ga ou kakalo aku gei mo la’u malaga ia kaugu’u. E le’o oe se Akua ou ke fa’alagolago iai kalu lou le amagaia mai o a’u. Ole aso mulimuli gei ou ke koe kakalo aku ai ma ou ke le koe fia foi aku ia ke oe”.
Ua nofo ifo nei Mona i le nofoa ole malaeva’alele ma le ita tele. A’o ia faupu’eina mafaufauga ole ita i lona mafaufau, na faateia o ia ina ua fa’afuasei ona sau le fa’asalalauga ma faapea mai, “O se tala fa’anoanoa, ole va’a na fa’atoa tu’uva’a atu mo Amelika, ua iai se fa’alavelave ina ua pa ma pa’u i se ogasami, ma ua maliliu uma le pasese”.
Na fa’ateia tagata uma ina ua faataitaio Mona ma loimata pau lava ana upu, “Fa’afetai le Atua, Le Atua o e lagona mai a’u, se manu o a’u le isi tagata e fano ile aso”. Na vave ona fo’i le talavou i lona aiga ma ia maua ai lona tinā o tatalo. Na fa’alavelave le talavou ma ia tagiaue i autafa o lona tinā ma ia faapea atu, “Mom, fiu e sola ese ma le Atua ae taumulimuli mai lava e laveai a’u”. Ua ia fa’amatala le mea sa tupu ile malaeva’alele ma avea o se vaila’au ile loto o si ona tinā. O inā, na toe fo’i ai Mona e auauna ile Atua e pei ona a’oa’oina ai o ia e ona matua. I le 5 tausaga mulimuli ane, ua fa’amanuiaina lona olaga ma avea o se faifeau i lo latou nuu.
