Na atagia i tusitusiga a le Taitai o le Ituagai ia Tuilaepa Sailele Malielegaoi le le sa’o lea ona faatinoina o tiute tauave o le Fofoga Fetalai o le Palemene o Samoa ia Papalii Taeu Masipa’u.
E fa’avae lena manatu na faia i luga o le Nusipepa a le Samoa Observer, i le tuuina mai ai lea o pepa o fa’amatalaga mai i le Ofisa o le Fono Aoao Faitulafono, o se gaioiga e manatu le Tatai o le Ituagai e le amiotonu, talu le aliali ai o uiga fa’aituau aemaise i mataupu ma’aleale e aafia ai le Vaega Fa’aupufai e Puipuia Aia Tatau a Tagata.
Ae peitai i le tali fuaitau a Papalii e ala i se pepa o fa’amatalaga i le afiafi o le aso, na ia matuai teena ai nei mau, ma fa’amanino mafuaaga o ana fa’asalalauga oloo tu’uina aloaia mai.
“O lo’o tatou folau ile vaitau e mo’onia ai le fa’ailoa ma fa’amanino o mataupu i auala talafeagai mo le silafia manino e le atunuu, o ni mataupu oloo fia malamalama ai. E leai ni aiaiga fa’aletulafono poo ni faiga fa’apalemene e noatia pe faasa ai le Fofoga Fetalai ona faatino se/ni pepa fa’amatalaga e fa’amanino ai i le atunu’u mataupu e ao ona o latou silafia.”
Na fa’aalia e Papalii ua tu’umaualaloina le nofoa i lafoga ua faia e ala i tusitusiga, ma e tatau i soo se sui usufono ona fa’aaloalogia le tofiga o le Fofoga Fetalai, o se tasi o tofiga maualuga oloo maioio i le faavae.
O tusitusiga a le Fofoga Fetalai na fa’ailoa ai foi le amanaia o le aia saoloto e fa’ailoa ai manatu.
