Ua finau le Mālo mo avanoa faasikolasipi i atunuu i fafo, mo fanau a Samoa oloo i le aoga mo tamaita’i ma ali’i e fia faigaluega i luga o va’a alalo, (sailors).
O lea fuafuaga, na saunoa iai le Minisita o Galuega ma Atina’e Tetele a le Mālo ia Olo Afoa Fiti Va’ai, i taualumaga o le Palemene i le aso ananafi.
“E fia si’itia le numera o fanau aoga e ulufale i le aoga mo tagata sailor.
“E fia si’itia foi tomai fa’apitoa mo i latou. Mo le silafia, e tele la’asaga e tatau ona uia e fānau ina ia ausia ai tulaga maualuluga e faigaluega ai i luga o va’a.
“Ae peitai, e le’o ausia lena tulaga, ona o le lē lava o alagaoa e fa’atino ai aoaoga.”
O lea foi ua va’avaai i le aumaia o a tatou lava tama fānau ua ausia tausaga fa’atapulaa e muta ai le galulue ai i luga o va’a, e faia aoaoga e saga fa’aupegaina ai fānau i Samoa nei i agava’a olo’o mo’omia.