UTOS UNITHOLDERS ANNUAL GENERAL MEETING No. 13 (FY2022-2023)
HON. LAUTIMUIA AFOA UELESE VAAI
KEYNOTE ADDRESS, 26th APRIL 2024
TIME: 9.30AM/10.00AM
PAIA:
Lau Susuga i le taitai o le sauniga, Le Aufaigaluega Paia a le Atua. Lau Afioga i le Taitaifono o le Komiti o Fa’atonu ma le Laulau-ā-fono. Lua Afioga i Tausi Mavaega. Le paia ma le mamalu o le aufai-iunite ua mafai ona tatou auai fa’atasi i le maota nei, fa’apea i latou o lo’o mā‘ua mai taualumaga o lenei Fonotaga i atunu’u mamao, o lo’o tauala atu i feso’otaiga fa’aonaponei, le tatou upega tafāilagi ma upega feso’otai.
Oute fa’atalofa atu i le Suafa Manumalo o lo tatou Alii Fa’aola o Iesu Keriso. Talofa Lava! Tau a ina o’u pai i Vai-o-le-Tama, ma ou fa’atulou auā le paia ma le mamalu ua ‘ofaga potopoto i le maotaga nei, fa’apea foi i latou o lo’o feso’otai mai i le tatou upega tafāilagi ma upega feso’otai; oute talitonu o paia lava ia o Samoa mai le Matāsaua se ia pā’ia Agalega. O paia e le gafataulimaina e so matou leo. Auā o paia ua taoto, a ō se ala o’o. Ei le Atua pea lona viiga, auā o Ia o le fa’apogai o mealelei uma, ua mafua ai foi lenei taeao fou, ua tatou lauluafesilafai ai.
AUTU:
E lagona le fiafia tele ina ua vala’aulia a’u oute faia le fa’amatalaga autū o lenei fonotaga fa’aletausaga lona 13 a le aufaiiunite ale Fa’aputugātupe Teu-faafaigaluega o Mavaega Tausi o Samoa (po’o le UTOS). O lou taimi muamua foi lea oute fa’atinoina ai lenei matāfai’oi taua, ona o lau fonotaga fa’aletausaga muamua foi lenei, talu na ou tauaveina le tofi Minisita o Tupe, ma o se fiafiaga tele foi lea iā te au.
O le tausaga fa’aletupe 2022-2023 o se tausaga mo le to’e fu’ataina, po’o le toe tapu’eina o le tamāoaiga, i le maea ai o a’afiaga o le lalolagi, ona o le fa’amai o le Koviti-19 ma le tele o isi fa’afita’uli o lo’o a’afia ai le lalolagi, e pei o taua ma fa’alavelave fa’a-lē-natura.
E ui na mamao atunu’u o lo’o a’afia i tele o nei fa’afita’uli, a’e iai pea ‘ona a’afiaga i luga o le tau o le soifuaga i Samoa nei. Ua fa’aiti’itia ai foi le tele o oloa fa’atau mai, a’afia ai nisi o pisinisi, ma fa’aiti’itia ai ma avanoa faigaluega, ma ua utiuti ai avanoa e maua ai seleni a tagata lautele.
O lo’o fa’aau’au pea ona ave le fa’amuamua a le tatou Malo, i tatou Tagātanu’u!, e pei ona i ai le Ta’iala mo le Lumana’i Manuia o Samoa 2021/2022-2025/2026, e ‘au’au le vaaiga taulai, i le “Tausia o le nofo feālofani, le saogalemu, ma le sa’olotoga mo tagata uma” a’o lona sini autū, “Ia fa’aagava’aina alālāfaga, fa’amausalī le lotoifale, ma fa’amaite le fa’atupulaia o le tamāo’aiga”.
O le Fa’aputugātupe a le UTOS, o se tasi lea o atina’e a le Malo e mafai ona ūnaia atili ai le sini autū “Ia fa’aagava’aina alālāfaga, fa’amausalī le lotoifale, ma fa’amaite le fa’atupulaia o le tamāo’aiga”. E pei ona silafia, o le fa’amoemoe autū na fa’atuina ai lenei Fa’aputugātupe, ole tu’uina atu lea o avanoa tutusa mo tagātanu’u Samoa uma, e aofia ai tagata taitoatasi, pisinisi, o fa’alapoto’potoga e pei o aulotu, o mafutaga ese’ese i totonu o nu’u ma afioaga, e fa’agalueina ai a latou seleni, mo se tupe fa’asili e toe maua mai ai. A lelei le tupe fa’asili, ua mafai ona toe tapu’e ai atina’e o lo’o i ai ile taimi nei, pe toe fai ai foi nisi atina’e fou, ma fa’atupulaia ai pea o le tamāo’aiga.
E telē le sao o lenei Fa’aputugātupe i le toe tapu’eina o le tamaoaiga o si o tatou Atunu’u. O tupe toe totogi atu i le Malō, e tauala atu i tupe totogi fa’a-tufatufaga (dividend pay-out to government), ua mafai ai pea ona fesoasoani i le fa’aleleia o le tamaoaiga, le soifuaga lautele, atina’e tetele ale Malo, fa’apea se siosiomaga mo pisinisi e gafataulimaina e o tatou tagata. E lagolagoina foi e le Malo le fa’aaogaina o auaunaga a le UTOS, e fa’alautele ai le tamaoaiga o le Atunu’u, e tauala atu lea i fesoasoani o lo’o fa’amatu’u atu i nisi o Fa’alapotopotoga Tumaoti a le Malo, o lo’o nōnō atu i ai seleni e fa’aaoga tatau mo nisi o atina’e tetele a le Malo.
Vaaiga i le Lumanai:
Oute talitonu, o se avanoa lelei nei oute fa’asoa atu ai foi i nisi o fuafuaga tu’utu’umamao a le tatou Malo, e unaia ai le atina’eina o le soifuaga lautele ma le fa’alauteleina o le tamaoaiga e gafataulimaina mo o tatou tagata;
- O le Atina’e lea o le tasi (1) le miliona tala mo itumalo e 51 i le tausaga, e pei ona fa’agasolo nei, lea ua tatala le avanoa, e mafai ai ona teu fa’afaigaluega se vaega o lenei seleni a Fono Fa’avae, i totonu o le UTOS.
- O le ā talimalo Samoa i Fonotaga a Fa’auluuluga uma o Malo mai atunuu e 56 o le Taupulega ia Oketopa o le tausaga nei. O lo’o fa’aauau pea tapenaga o tulaga mo’omia ma auaunaga a le Malo mo lea Fonotaga taua, ma ua amata tu’uina atu fo’i e le Malo le lagolago i pisinisi tumaoti ina ia atoatoa vaega uma o nei tapenaga.
- O le ā fa’amaeaina o pasene mulimuli o le si’itaga lautele o totogi mo tagata faigaluega a le Malo i le tausaga fa’aletupe 2024/2025, e tau talitali ai le si’itia o le tau o le soifuaga.
- O lea ua toe fa’aauau le faatinoga o atina’e tetele a le Malo, i le maea ai o tapu o le Koviti-19, ma e talitonu, o le ā siitia ai tupe fa’aalu i totonu o le tamaoaiga, ma maua ai avanoa faigaluega mana’omia, fa’aopo’opo ai tupe maua mo o tatou tagatanu’u ma una’ia atili ai le tamaoaiga.
Upu Fa’aiu:
A’e lei fa’aiuina se fa’amatalaga i lenei taeao, e momoli atu lau fa’afetai tele i le paia ma le mamalu iā te outou le aufai-iunite, i la outou lagolagosua faifai pea, ma le talitonuina o le auaunaga ofoina atu e le UTOS, e fa’agalueina ai ā outou tupe teu. E momoli atu foi le agaga fa’afetai ma le fa’amalo i le Komiti o Fa’atonu, i le ofoina mai o lo outou taimi taua, le toma’i ma le agava’a e fa’atonutonu folau ai le Sā o le Pulega ma le aufaigaluega ale UTOS!!!
I le Tausi Mavaega, fa’amalo fa’afetai le fa’ato’ato’a i le fa’ataunu’uina ole lua vala’auina. Le Ofisa Sili o Pulega ma le aufaigāluega a le Kamupani o Pulega, o lo’o vae ma lima i ai le tatou galuega, fa’amalo fa’afetai mo galuega i lenei tausaga fa’aletupe ua fa’amaeaina. Oute fiafia foi e fa’ailoa atu le fa’atumauina pea o le lagolago a le tatou Malo, i le fa’amoemoe na fa’avaeina ai le Fa’aputugatupe a le UTOS.
Ma fa’auma atu ai ma sau fa’amatalaga, oute fa’apea atu ai, ua tatala aloaia nei le fonotaga fa’aletausaga lona sefulumaletolu (13) a le au fai-unite, a le Fa’aputugatupe Teu-Fa’afaigaluega o Mavaega Tausi a Samoa.
SOIFUA MA IA MANUIA.