O le lima taumatau o le Fale Sue Toto a le Ofisa o le Soifua Maloloina, o le auaunaga lea a le Sosaiete o le Koluse Mumu.
O le tautua a le Sosaiete oloo ofoiina atu iai e le mamalu o le atunuu paina toto o ituaiga toto (blood types) eseese, ma toe ofoina atu ai i latou e moomia pe a agai i le maota mo gasegase ae ua mo’omia se toto, ma e leai se totogi.
I le tatou fa’atalanoaga ma le Peresetene o le Sosaiete ia Namulauulu Tautala Mauala, na ia ta’ua ai le aofai o paina toto e fa’aaogaina ma le tatau i totonu o le vaegataimi fa’atulagaina.
“O le numera o paina toto e tatau ona iai i le pusa aisa oloo teu ai toto i le vaiaso, a maua lava le limasefulu agai atu i luga. Ae manatua foi e eseese ituaiga toto.
“Ae o le aofai o paina toto e tatau ona fa’aaogaina i totonu o le masina, pe tusa o le toluselau agai i le faselau.”
O le toto, o le ola. Pe a manatu e fa’amaligi pe fa’amaumau foi, oloo iai le isi tagata soifua oloo tau saili lena meaalofa o le tino, e ola ai. O lo’o tatalo mai lava foi le koluse Mumu i le atunuu i lea foi fesoasoani ina ia ofoina atu, e fa’asaoina ai se soifua a fano.
