Ua tatagi i taliga leo o musika eseese ua aumaia ai lagona o aso fiafia. Ua faatalua mai fagaofe, o mea faapāpā faaonapo nei, ua pepese mai faga ta’avili a tamaiti, o logo tagitagi, fa’apea fo’i mōli ua fe’ilafi mai. Ua tuliususū fa’alausoso’o nofotane ma faiāvā aua ua oo i taimi e fai ai vae ole tagata ia, ole a fanau mai le pepe fou.
A’o tapisa mai fiafiaga a le nuu, oloo o’u nofo faatuvae tasi nei i lalo ane ole papata tele lava i lo matou fanua ma mafaufau, po’o fea a maua mai ai se tupe e fa’atau ai se meaai a si a’u fanau aemaise o ni a la meata’alo ole kerisimasi.
E leai se tasi o ma’ua ma lo’u toalua e faigaluega. O si tamaloa lava e gafa ma le faiga ole lafo ma le fa’atoaga e le gata e tausi ai lo matou aiga, ae o le fa’aao’ogaina foi o si ā ma fānau o Sione olo’o ile tausaga 5, faapea le teine o Mara olo’o ile vasega 3.
Ua ou nanati atu nei ma faiatu i lo’u toalua, “Se ina alu ia e va’ai po’o ua iai ni uli e ono ave ile maketi pe maua mai ai sina tāla ole kerisimasi”. E lei ao le aso na soso’o ai ae ua sa’esa’e atu le taga talo a Sione ma si ona tāma ile auala e fa’atali le pasi muamau au’a e māmao mai Salelologa lo matou nu’u. Talofae i si a’u tama ai lava pau lea o le tamaititi i Samoa ua alu e nofonofo ile māketi ae toe tasi le aso fanau mai le Mesia na valoia.
Ailoga ua taunuu le pasi i Salelologa ae ua fa’amalau mai le lisi a Mara ia te a’u. “Mama, vili papa e omai ma aumai sa’u pepe meata’alo, o sa’u polo voli, ma fa’atau sata aisakulimi”. Ua te’a ane lava le 12 ile aoauli, e lei fo’i mai lava le faataugatalo. Se va’aiga fa’amomoiloto ina ua tu le pasi mulimuli, o’u vaai atu, ua toe sa’esa’e mai lava a lā tagatalo e leai ma se tautalo na taulia mai ile aso ātoa. Ua faimai nei si a’u tama o Sione, “Mama, ua ou fia’ai atu lava i meaai a isi tamaiti nā ananei sa o atu ma o latou mātua e fai a latou fa’atau, ae faimai papa e onosai lo’u fia’ai sei o’o mai ile fale”. Ia te a‘u ole tinā, oka se o’otia o lo’u loto peitai e faigatā tele ona ota tagi i luma o lata fānau.
I le ta tonu lava ole 12 ile vaveao ole aso 25 o Tesema ile tausaga 2011, ua pa’o mai logo a ekalesia taitasi ole nuu, pepese fiafia mai inugāti a tua’oi. O’u va’ai atu, o pusa aisakulimi, o pai, o keke, o falaoa faasiamu, ma le tele o mea’ai lea ua laulau ane i luga o la’o’ai a aiga ole nuu. A’o si a’u fanau, na o na uma lava ona fa’afeiloai ole kerisimasi, o’u va’ai atu ua ligi mai le ipu laumoli ma laulau mai le umu ulu ma kalo ma le miti. Leai ni ofu fou, leai ni meata’alo ua le lagona ai lava ma se fiafia ile na kerisimasi.
E va’ava’ai mai lo’u to’alua ma si a’u fanau, ua ou le gagana ae ua maligiligi lemu ane o’u loimata. Ua fesili mai nei si a’u tama o Sione, “mama aisea ua e tagi ai?’’ ua leai lava so’u tali atu ona ole mafatia ile alofa i si a’u fānau. Pei lava ita ua ou agaleaga i si a’u fānau ma le lē maua o so lā fiafia fa’apei o isi tamaiti ile lalolagi i lenei Kerisimasi.
Ua savali mai nei si a’u tama o Mara ma fusi a’u ma faimai, “mama, papa, aua e te lua faapenā. Ma te iloa lelei le tulaga olo’o iai lo tatou āiga. O le a le mea sili na’i lo ole o’o mai ole kerisimasi olo’o ātoa lo tatou āiga? E le’o mea’alofa e te lua aumaia mo i maua e tāua. E tāua le alofa e lavatia ai mea uma, o lea ma te alolofa tele ma si o’u tuagane o Sione ia te oulua, faafetai tele mo le tausiaina o i maua”.
Ua fa’apea ifo lo’u loto ile Alii, “fa’afetai mo fānau na e aumaia i o ma lima. Fa’afetai mo si o’u to’alua, fa’afetai mo le mea’alofa ole ola e te tu’uina mai pea i aso uma, ua aulia mai ai e le nei aiga le fa’aiuga ole nei tausaga”. O inā na fa’ato’a mafaia ai loa ona ou faapea atu i si o’u to’alua ma si a’u fānau, “MANUIA LE KERISIMASI!”.
