Oka! Ta’i sisiva so’o laau ole nei fanua e le mālōlō. Ua o ane foi manulele e femitai ile latou aufaipese e laulogo uma ai le Nu’u atoa. A’o se tautalaiti foi a anufe eleele ia ua tafitifiiti solo, ma le ta’avalevale a le ta’ifau i lumāfale e pei ua soona olioli lona loto.
Pagā lea, e ia te ai ea le auē? E ia te ai ea le mata mūmū? E ia te ai ea misa? E ia te ai ea le manu’anu’a?
Ua fiu si savili e kisikisi mai i o’u alafau e lē maluelue lava o’u foliga e atagia atu sina ‘ata’ata. A’o ai ea a mafai ona ata’ata atu ma ni foliga ua pei ole lanu ole malala? Ma ni laugutu ua tafetoto? A’o si ota mata ua pei ole lalolagi pogisā pe a o’o ina punitia le lā e ao.
Ai o faapea fafine o le Nu’u ma le aufaipese a le ekalesia o a’u o se fafine e fia fa’atuiese. E lē taitai ona iloa lota tino i ni mea fai. Manatu nisi o sota fia tagata. Ae le’o iloa mai le mea nei, e ala mai lava ile fa’alogo ile leo sauā o le to’alua e oo lava ina moe e le’i mālolo le patapatatū o lota fatafata ile tātāvale o lota fatu toetoe a nofo ai le mānava.
Ta te fa’asaga i u’amea ole afi ile aso atoa, ae se’i fo’i mai loa la le tamāloa e leai se mealelei, pe ita mai foi i seisi māfua’aga, ua mautinoa lava le o’omi o lota gutu, se tu’i inā mamafa i lota pāpātua, se kiki ua nofo i lota ‘ö’ö, a’o upu ua lafo mai na’o Iopu lava e lavātia ona tatali. Ua ta fia vala’au atu lava ile tuāoi mo se fesoasoani. Pagā lea ta te musu ne’i fa’aigoa ita o le fafine tagivale ile saofa’iga a tinā laiti. Ae o lota fefe foi ne’i atili sasau mai ai moko a le nei tamāloa.
Na pei o le tatafe o tafega le to’ulu ane o o’u loimata i lo’u fatafata ina ua ou fa’asaga ane ile isi itū o le umukuka, olo’o faatū mai ai si a’u tama ma lona ofuvae masae, ma tagiauēuē. Pau le upu oloo matala mai ua na’o le; “Mama, Mama, Mama”.
Oka se tui ina o’ona. Ta’i leaga lenei ata faasolo e matamata ai si nei alualutoto i minute uma o lona tamaititi. Oka talofa e, sa sili ai ona ou fanaua se pepe e lē pupula, pe logonoa foi. Se manū pe faafia ona sasa a’u e le tamaloa ile lau ole sapelu, e le afaina auā na te le’o lagona mai le auē a si ona tinā.
I le momomo o lo’u loto na ou toatuli ai ile ta’inafi ma ou fa’apea atu i lo’u to’alua,
“Se fa’amolemole tamā, ua vaivai lava lota tino. Ua lelavā foi e si a’u tama amo le avega o le fefe i taimi e te fasi ai a’u. Ou te lavā oono tīgā o upu ma lou faasauā mai, pau o lea, e sili ona ou oti nai lö ole pulapula mai o lē na ifo mai i lo’u manava a’o tafe ifo le toto i lo’u tino“.
O le aso lava lena na fa’apalasi ane ai lo’u toalua i luga ole tamaititi ma ana upu,
“E leo a’u o se tamä lelei. Atali’i, faamagalo a’u, e i luga o lo’u ulu le faamasinoga a le Atua“.
Ua o se vavega le iai o si a’u tama na sefeina ai lo’u ola. Ole aso mulimuli lava lena o le tagitu’i, ae ua feasogi i ma’ua o matua, ma sia ma tama, ua avea lo matou nofoaga o se aiga, ua le’o toe avea ma falepuipui.
