I le isi sefulu tausaga o lumana’i, ua tatau ona taunu’u ai le moemitiga o lo’o i le Ofisa o le Va’aitau a Samoa, ina ia mafai ona ia faia uma auaunaga tau va’aitau e aunoa ma le toe fa’alagoalago i isi atunu’u.
Na saunoa le Ofisa Sili lagolago a le Va’aitau ia Afaese Dr Luteru Tauvale i le tatou fa’atalanoaga,
“O le 80-90% o galuega fa’avaaitau lea ua mafai na faia iinei i Samoa sei vagana ai isi auaunaga oloo fesoasoani mai ai isi paaga mai fafo, ma o le fa’anaunauga lena oloo iai, ia tutoatasi lava le tatou ofisa fa’avaaitau.”
Ua atagia i lea pasene le maualuga o le tulaga o tomai fa’asainisi ua maua e nai o tatou tagata, o le fa’ailoga foi o aoaoga lelei i Samoa ma le finafinau i avanoa mo a’oa’oga i fafo.
E 11 masina oloo auai atu ai sui e toatolu a le Ofisa o le Va’aitau a Samoa mo a’oa’oga aloaia i Ausetalia ma o le aumalaga e aofia ai Sepi Pouvi Gafa, Fa’auiga Kalapani Lematua, ma Aloali’i Tavita Liu.
O lenei a’oa’oga oloo fa’amaite ai le Fa’alapotopotoga o le Va’aitau i le lalolagi. O le fa’amoemoe a maea nei aoaoga ona taliu mai lea o nei alo o le atunu’u ma fa’ailoga tipiloa i lea lava faiva o (Diploma in Meteorology).