E talitonu se tasi o alo pese o le atunu’u ia Mativa Sagote, o le tautua, o le fatu lea o manuia i so’o se aiga ma ua ia molimau i le ola finafinau e asu se ipuvai i lona aiga e ala i ana musika.
O Mativa Sagote po’o Kiva Noten ua lausilafia ai, ua avea nei ma se tasi o tagata pese e fiafia iai le toatele o tupulaga ona o le oa o ana fatuga e talafeauga lelei ma tulaga o le soifuaga fa’atupulaga talavou.
E ui i le na lauiloa, e leo galo ai le mafuaaga o le taumafai e atina’e le taleni.
“E tasi le mafuaaga na ou manao ai e fa’alauiloa lenei taleni, ina ia tausi ai si o’u aiga. A aunoa ma lea, e leai se aoga. Atonu foi o se auala e faia ai se sao i le atunuu e ala i fatufatuga.”
Na saunoa Kiva o le tausaga 2018 na fa’atoa amata ai ona pueina ana pese, i le 18 o ona tausaga, ma na amata mai i totonu o le ekalesia i taimi uma e tofia ai ia e lagiina ni pese o polokalame,
“Faigata ia o le tau amataina aua e saili le seleni e fa’atupe ai atoa ma le totogiina o falepue pese. E ui i lea, na ou iloa e iai auala a le Atua pe a moni le gaua’i o le loto.”
E oo mai i le aso, ua silia i le 20 pese ana fatuga ua fa’alauiloa, ma e le misi se vaipanoa ma le fa’alogoina ai, o le ata foi lea o le amanaia e Samoa o lana musika.
Ina ua fesiligia i le tulaga o le seleni na te maua mai i ana pese taitasi, na saunoa Kiva o le faaiuga o masina uma e maua ai tupe e oo atu i le $2,000 mai i ana pese, talu ua maua le isi fesoasoani tele o le faaaogaina lea o fola o upegatafailagi, le youtube,
“O le na seleni e le gata mo manaoga o aso uma, manaoga e fa’aleleia ai le taleni, ae posiposi foi mo le aiga.”
A’o agai ai i luma le soifua finafinau, na faailoa e Kiva o le atoaga o le taleni na te maua i le fa’amaualalo ma le aoaoina mai ia i latou ua loa tausaga o tautua i le pisinisi o le musika.
I lana feau fa’amalosi mo le tupulaga o lo’o iai lenei taleni,
“Aua le fiu gofie, tusa lava pe ulagia oe. A e manatu i sou lava lelei ma le tautua e ao ona faia mo lou aiga ma le atunu’u, tumau le loto toa ma faia galuega lelei.”
O Kiva o se alo e fa’asino ia Sagote ma le faletua ia Lesili Sagote. O se tasi o le fanauga toaono a ona matua, o e oloo lagolagoina ana taumafaiga.
