O le a iloa tonu e le aufaifa’atoaga ma le aufailafumanu taimi e malolosi ai timuga, ma taimi e ono iai lamala, e fua iai a latou gaioiga ina ia oo mai taimi leaga o suiga o le tau, ae o lo’o lelei pea a latou atinae, e ala i le metotia o le a mafai ona fa’aaoga ai telefoni feaveai ma masini fa’aonapo nei.
O le fa’amaite lea ua fesoasoani mai ai le Malo o Ausetalia e tauala i lana Matagaluega o le Va i Fafo ma Fefa’atauaiga, e fa’atupe se fola i luga o upegatafailagi, ua fa’aperetaniaina, o le ‘Agrifood Systems and Climate Explorer’.
I le fa’atalanoaga ma le Ofisa Sili Lagolago a le Matagaluega o Fa’atoaga ma Faigafaiva i le vaega o Faigafaavae, Fuafuaga ma Fesootaiga, na saunoa ai Afamasaga Taimalietane Matatumua, na ia saunoa ai o le fola lea e maua uma ai fa’amatalaga o le fesuia’iga o le tau, ma e aoga mo le aufailafumanu ma le aufaifa’atoaga.
Ae ina ua o tatou fesiligia le sui o le Ofisa o le Va’aitau e tusa o le latou sao i le fausiaina o lea fola, na saunoa Kotoni Galu Fa’asau, o le oloo fa’auluulu iai le vaega o fa’amatalaga o le tau (Climate Section) a le Ofisa o le Va’aitau, na ia saunoa,
“E tele ia o le sao o le Vaaitau i le galuega lenei. O le Va’aitau olo’o iai fa’amatalaga talu mai lona fa’avaeina i Samoa i le fia sefulu tausaga ua mavae, e fa’atatau i le fesuiaiga o le vevela o le ea, timuga ma isi.
“O fa’amatalaga na mai le matou Ofisa, e tu’uina i luga o le fola lea o le a faia i luga o upegatafailagi, ona fa’atusatusa lea o suiga mai i le na fia sefulu tausaga talu ai agai i le taimi nei, ona iloa ai lea, o ni ata va’aia olo’o agai iai le tau i Samoa nei.
“O le taunuuga o le na galuega, o le a mafai e i latou olo’o galueaina laufanua, ona iloa tonu metotia ma vaega talafeagai mo atinae, ina ia aua nei maimau lo latou tautiga pe a oo mai mala fa’alenatura.”
O le nei polokalame na faia ai fa’atalanoaga amata i le Faletalimalo a le Tanoa Tusitala i le aso, na auai ai le Matagaluega o Fa’atoaga ma ana paaga tumaoti.
Olo’o sosolo foi lenei poloketi i lalo o le fa’amalu o le polokalame a le Resilience Initiative for Food and Agriculture, (RIFA), lea ua aumai ai maimoaga mai le Iunivesite Aoao a Ausetalia, faapea Australian Common Wealth Scientific and Industrial Research Organisation, ina ia faatamoe suesuega mo le mautinoa e maua pea taumafa mai lafumanu ma fa’atoaga, i se taimi umi e ui i uiga louloua o le tau.
O le faia o le nei polokalame, ina ua maea le fonotaga a Minisita o Fa’atoaga a le Pasefika i le tausaga ua mavae.