E ao ane lava o tau fetuʻutuʻunai loʻu mafaufau po o ai ia aitu na manamananū ma faasoesa i le pō, ua le mafai ai ona ou moe i loʻu fefe, pei e foliga o ni agaga leaga.
I aso uma, ou te fesili ai lava i loʻu tinā pe na ona lagonaina ni leo o musumusuga i le tulua o pō ma ao.
Ae fai mai, na te leiloa. E faapena foʻi loʻu tama. Ua ou mafaufau nei, po o le mea naʻo aʻu o lea e tau faailoa mai ai gagana a aitu fua, i le leai ma se isi e iloaina.
Ou te maitauina pea lava tulivae o oʻu mātua i taimi e mālōlō ai—e fai o le maʻanuminumi, ae o le uli ma māfoʻefoʻe.
Tuufesili loʻu mafaufau pe aisea e lē faapea ai foliga o oʻu tulivae ma tulivae o isi tagata. AISEA?
E iai taimi e faatalasua ai tagata, ua pei o se vaaiga uiga ese, ae ua tau lagona ai foʻi ma loʻu mā.
Ua faasolo nei ina ou matua, ae o loo faalogoina pea nei leo i le valuāpō.
I se tasi o aso, aʻo oʻu tapenaina lo matou fale, na ou tau ai i lalo o le moega o oʻu mātua ni faaputugā pepa o loo tusia ai ni tusitusiga e faapea:
“O LE ASO LENEI NA LĒ USITAʻI AI LA MĀ TAMA IA I MAʻUA.”
E le gata i lea, ua iai ma se fuaiupu e foliga mai o se faatoesega ma se olega.
Na ave lava loʻu mafaufau i leo faatigātali i le leva o le pō, ma tau faatulaga i le loto uiga o pepa nei ua ou mauaina.
Na tonu ai loa i loʻu mafaufau o le a ou lē moe i lenei pō, ae sei saili lava po o fea e sau ai leo nei.
Po o se taimi ua teʻa le 12 i le pō, ua momoe uma tagata, ae amata loa foi ona faalogoina musumusuga.
Ua ou tū nei i luga ma le pālaʻai, savali i fafo le tamaʻi paʻūsisi na ou moe ai, pulupulu loʻu ʻieafu, toetoe a masae i le fālōina.
O le mea e ofo ai, na faapea mai oʻu mātua, latou te lē iloa ni leo.
Aʻo lea, e sāua i laʻu faalogo—o le latou faleʻoo lea e manamananū mai ai tagata.
Ua ou faalatalata atu nei, ma o se vaaiga e tagi ai le loto o se ataliʻi e leʻi manatu i se vaaiga faapea.
O loo tootutuli nei oʻu mātua i le pogisa, i totonu o le latou faleʻoo e fola i maa, ma musumusuga e tau lē lagona.
Pau lava le mea na ou lagona, o loʻu igoa o loo taʻua i upu o se tatalo.
Na ou sösö atu ma tootuli faalatalata atu ma iloa ai, o aʻu GAIOIGA sese e faia i aso taʻitasi, e leai soʻu manatu mamafa iai.
Ae o loo avea ma avega mamafa i nai oʻu mātua, ma fai ai lava i laʻua ma oʻu sui e talosaga i le Atua—faamolemole, aua lava nei oʻu malaia.
Ua ou iloa nei, o le popole o mātua, e lē fia avea oʻu faletonu ma afuaga o ni oʻu malaia.
Ua lē popole ai lava i le mātuitū o maa o le faleʻoo, ae tootutuli ai pea.
Ua lē kea lava i le mālūlū, le vaivai, ma le fiamomoe, ae sei memumemu ia ma taʻutaʻu atu loʻu igoa i Lē na faia aʻu, aua ua ou lē malamalama i le faaletonu ua ou iai.
Leitioa a manuia aʻu taumafaiga i aso uma, ona o loo iai ni tulivae auleaga e musumusu ma musumusu pea i le pō uliuli mo aʻu.
E taua le tatalo a mātua—o le tatalo faatauānau, o le tatalo e faia ma loimata, o le tatalo mo le manuia.
E talepeina ai saisaitiaga o le malaia neʻi aafia ai le fanau.
Pe ua vavala mai ai ia te aʻu, o le tele o loʻu leaga ma le lē usitai, o loʻu faaauleagaina foʻi lena o tulivae a oʻu mātua.
