Ua faaiuina nei le taumafai a le tina ia Utumanu Fuimaono i le mataupu ua ta’ua o le Bicultural social services i lona laasaga lona fa.
O le mataupu lenei e naunau ai lava le tina lenei, ona o lona finafinau ina ia aoaoina le tatou gagana i aoga i Niu Sila.
I le faatalanoaga ma le Samoa Newshub, na ia faailoa ia e lei faigofie lana folauga o le avea ai ma Faiaoga.
“E toa 6 lau fanau.
Sa matou o mai i Niu Sila I le tausaga e 2016, e matuai faigata le amataina o le maua aiga.
Sa ou nofo I le fale ou te lei faigaluega ona sa ave la’u fa’amuamua i aoga a la’u fanau mo so latou lumanai.
E le gata i lena, e fesili atu I le ofisa o aoga i inei pe mafai ona talia Tusi Pasi mai Samoa ae peitai e le’i taliaina ae e ao ona ave e toe iloilo pe toe aoga. Sa faapea mai e totogi le tupe e $900 e faia ai le iloiloga o Tusi Pasi nei.”
E lei muta ai iina le sogasoga o le tina lenei, i le taua ia te ia o le galuega faafaiaoga, ma le fia ausia o lana miti ina ia aooaina le gagana Samoa i atunuu mamao.
“Sa ou sailiili lava i se auala e mafai ai ona maua le avanoa e maua ai se galuega lelei e tausi ai lo’u aiga.
O a’u lea sa ou galuega fa’afaiaoga fesoasoani i le Aoga Tulaga a Finlayson ae peitai o lea ua ou fa’amavae ae olo’o o’u fesoasoani nei ile Falelalaga Home Center ona o lo’u naunauta’iga ia fa’atumauina pea le gagana Samoa ma le aoaoina o measina faaleaganuu i alo ma fanau ona o se meaalofa mai le Alii.”
I le faauu ai ma lona faailoga i le Aso Lua o le vaiaso nei, ua ia saunoa ai na te faafetaia le lagolagoasua a si ona toalua ma le fanau, o aiga ma uo, ae sili o le alofa o le Atua.
“O lo’u naunauta’iga ia avea au ma fa’ataitaiga i la’u fanau e va’ava’ai mai oloo o’u taulamua e finau i a’oa’oga ona o le lu’i lea olo’o faamanatu pea mo latou ona o le faigata o lenei olaga.”
O Utumanu oloo galuega foi i le Aoga Tulaga Lua a Takanini e aoaoaina le tatou gagana.
