Ua matuai faamalieina le Amepasa o Iapani, Ryotaro Suzuki, atoa ai ma sui o lea malo, i le molimauina o le tausia lelei e le aoga tulaga lua a le afioaga lenei o Fagali’i o aseta na fesoasoani mai ai ma faatupeina.
O le tausaga 2020 i le masina o Setema na tatala aloaia ai le faleaoga fou na faatupeina e lea malo.
O le faleaoga e aofia ai:
- Le potu tusi,
- Le potu mo faiaoga,
- Fale e tua iai le fanau aoga ma le aufaigaluega,
- Potu aoga.
E le gata i lea, e toalima faiaoga mai Iapani na tautua i le laumua lenei, amata mai i le tausaga 2011. E tailua tausaga a le faiaoga e fesoasoani ai i faiaoga a le aoga ma fanau i mataupu aoaoina.
I le utiuti ai o faiaoga i lo tatou atunuu i le nei vaitau, o le tasi lenei o auala o loo foia ai le faafitauli.
Mo le silafia, o le tausaga 1972 na amata ai le polokalame lenei o loo malaga mai ai faiaoga ma tagata mai Iapani ua silia ma le toa fitu selau, e fesoasoani i le itu tau soifua maloloina, ae o aoaoga foi i mataupu o le Faasaienisi ma le Matematika.
I le faatalanoaga ma le Samoa News Hub, na saunoa ai le susuga i le Puleaoga:
“O le avanoa taua lenei ua maua e fanau i le tausaga 5 ma le tausaga 6 i lenei laumua.
Ua mafai ona aoaoina tomai fou mai faiaoga o loo agai mai pea i le matou aoga.
O le lagona fiafia, o le taimi lava e tasi o loo a’oa’o ai le tautala i le gagana Peretania.
E le gata i lea, ae se faamama avega foi mo le aiga faiaoga i le tauaveina o vasega nei.”
– Val Matatia
Na saunoa le Amepasa, e le uma le fia fesoasoani mai pea o lona malo mo le itu tau aoaoga i Samoa, aua o le lima taumatau lea o le soifua manuia o tagata uma.
O se tasi lenei o poloketi na faatupeina e Iapani, lea na asia i le aso.
