E tuai lava ona ou mānava i pō uma, ona o le tau fa’apaleniina o tupe maua a le kamupanī. E lē mafai fo’i ona ou alu ese se’i vaganā ua ō ese uma le aufaigaluega, ma fa’aso’oso’o uma vaipanoa o le lotoā i la’u āsiasiga e siaki po ua saogalēmū vaega uma, ona fa’ato’ā ou tu’umuli ai lea.
O le tele o pō, e te’a le 12 i le vaveao fa’ato’ā ou tu’ua le falefaigaluega. O la’u lava lā masani, o le tulituli atu i le fale’oloa e tasi i le magāala lea ou te ui ai, mo sina mea’ai, auā e leai lava se fale’aiga po’o se fale’oloa lata ane i le kamupanī. Po’o le ā lava la lo’u tuai atu, e fa’atali mai pea le fa’atau’oloa se’i o’o atu a’u e piki se mea’ai, ona tapuni lea o le pisinisi i le tū lua o pō ma ao o aso uma.
Na’o a’u lava i lo’u fale, ma e fai sina mamao mai i le taulaga. E leai ni tuaoi e latalata mai. O le tele lava o mea’ai i lo’u fale, e ma’umau lava—pala, pe ave fo’i i mā ta’ifau. Talofae ai o iai ni fanau o fia’ai, ae o lea e faama’umau nei taumafa.
Ae ou te le’i tuua lo’u fale mo galuega i le taeao na sosoo ai, na ou tatalo ai lava, “Le Atua e, ia ola se tasi i o’u lima i le aso nei.”
Ua faagasolo galuega masani o le aso, ma e lei iai lava se tasi na mana’omia sa’u fesoasoani. E o’o lava i le aufaigaluega sa masani ona talosaga mai i ni tupe—e lei faapea mai i lea aso pe mafai ni a latou aitalafu.
Ina ua ou mānava, o se aso sili lea ona mamafa galuega. Ua matua lagona lo’u vaivai, ua sau fo’i le gaogao o lo’u manava, ua alu ni aso e lei o’o iai se fasi mea’ai. Poo le lata i le 12 i le vaveao ae ou oso i le ta’avale, tulituli atu loa i le faleoloa masani mo se taumafataga, a’o tetele ai lava timuga ua tau leiloa ai le auala i le puaoa.
E masani lava ona ou taunu’u atu i le faleoloa ona sau lea o le fa’atau’oloa, ua tu’u mai le mea’ai i o’u lima ae piki atu lana tupe. Ae o le pō lea, ua ou oso i fafo ona ou ulufale atu loa lea i totonu, ma ta’amilomilo e foliga o lo’o o’u lē mautonu po’o le ā se oloa e fai.
Na te’i lava ua ou tago atu ma uu mai le apa susu, ae ua ata le fa’atau’oloa ma fai mai, “Oka! Ea, ua iai sau pepe?” O a’u lenei, ua na’o lo’u feliuliua’i i le kesiā ma tau fetuuna’i lo’u mafaufau pe aiseā o lea ou mana’omia ai fua se apa susu, pe lā ē iai ni tamaiti i lo’u fale.
Fai mai lo’u mafaufau, “Totogi le apa susu ma ave i le ta’avale.”
Ua ou fa’atofa nei i le fa’atau’oloa ma ou savali ese loa, fa’aola le ta’avale ma aga’i atu i le fale, a’o fa’ateteleina ai le pogisa o le auala.
A’o alu le ta’avale, fa’afuase’i lava ona ou mana’o ou te afe i se magāala ou te lē masani ai. Ua tau sau lo’u afu mālūlū – po’o le mea ea o lea e tata’i a’u e ni agaga leaga. Ua tu fa’afuase’i le ta’avale, ae fai mai lo’u mafaufau, “Alu pea.” Ua toe fa’aola loa ma tolotolo mālie.
Na fa’afuase’i lava ona tau atu la’u va’ai i se fale o lo’o tu matila mai i luga o le a’ega—pau lava fo’i lea o le fale i lea nofoaga. Na’o la’au tetele ma vao, ae o lo’o taupula’ia mai ai se mölī matagi. Na alu atu pea la’u ta’avale ma afe loa i lea fale i le leai o se māfuaaga manino.
Ou te fa’alogoina pea se leo o musumusu mai, “Tago i le apa susu ma oso i fafo.”
Ua ou oso töa’i i fafo ma ave le apa susu, ma vala’au atu loa, “Talofa? Fa’amolemole, po’o iai se isi iinei?” E le’i leva ae ou fa’alogoina le pa’o o vae o se tagata o lo’o aga’i mai i le faitoto’a. E matala mai le faitoto’a, ae o’u lagona atu loa le tagi leotele o se pepe, fa’atasi ma le leo o le tina o lo’o fai atu: “Shhhh… shhhhh… talofae i si a’u tama.” E foliga mai e fa’anoanoa le tina.
“Ua ā? O tau saili se tasi?” Ole fesili mai lea a le tamā. I lo’u leo mālū, na ou tali atu ai, “Ou te leiloa pe e te lua mana’omia lenei apa susu…” E le’i uma atu la’u tali ae oso mai le tamā, se’i atu le apa susu ma momo’e loa aga’i i le mea o lo’o tagi mai ai le pepe. E le’i leva ona mou atu le tamā, ae lē toe fa’alogoina loa se leo o le pepe o tagi i le vaeluapō.
Ua ou liliu e toe fo’i, ae tuliloa mai a’u e le ulugali’i ma fesili mai po’o a’u o se agelu.
“Leai,” o la’u tali atu lea.
Ua fetagisi le ulugali’i ma fai mai, “Ali’i e, ua alu lenei pō o ma tatalo i se vavega—ia maua se apa susu e fafaga ai si a ma tama ua leva ona tagi i le fia’ai. Toeitiiti lava a tulaga faletonu, ae fa’alogoina loa se tu’i i le faitoto’a. Fa’afetai tele lava. O oe lava o se agelu ua auala mai ai le tali o la ma tatalo.”
Ua ou toe fo’i nei i lo’u fale, ae ua lē mapu la’u fa’afetai i le Atua, ua ia ta’ita’iina a’u i ē o lo’o mana’omia le fesoasoani.
O le pō lava lena na amata ai ona lē mapu lo’u asia o lea aiga ma se fa’atauga tele lava—ae e lē galo lava se apa susu a se alualutoto i le leva o le pō pe a mānava.
