E popogi ane lava o o’u femasaua’i ma le sulu aulama i lalo o le togakoko, e tau su’e se vaipanoa ole fanua o ola ai se tipolo aua se laumoli e utu fagu ma si o’u tei pepe. Ai pau lea ole pepe e fetagisi faatasi ma alisi ile pogisa, ma le tino ua patapata i faiga a namu. E pepese mai faigalotu afiafi a aiga ole nuu oloo matou taufao ma loi poo ai e mauaina lau lelei ole laumoli a’o tau afisi lava si o’u tuagane faatoa tasi tausaga lona matua.
Na maliu si o’u tina ina ua fanau si o’u tuagane, ae tuua ai na’o i matou ma lo ma tamā i lo matou lava faleoo ile aiga o lo’u tinā. O le mavaega a lo’u tina na faia i lo’u tama a’o i luga ole moega a le falema’i na faapea ai ana upu, “A e alofa, ia e nofo i lo’u aiga e tausi nai o’u matua”. Ole Mafuaaga lena o lo matou le o ile aiga o si o’u tamā.
Talu lava ona maliu si o’u tina, ua suia foi le vaai a lona aiga i si o’u tamā. Tusa lava pe olea le toatele o tama ole aiga, o feau uma lava e faia e nafa ma le faiava. Ole uta, ole tai, ole faatau o meamata ile taulaga, ole faamoemoe iai o monotaga a le nuu, faapea meafai a le ekalesia. Ua vaaia lava fo’i le suiga i lo’u tama e le gata ua ma’ima’ia lava, ae ua paee lava foi. Ai ona ole atu ole mafaufau ile tausia ole aiga ae leai se tasi e tausoa le avega auā sa fai o si o’u tina e fesoasoani. Ua atili ai le mamafa ole amoga auā o lea ua iai le pepe fou ile aiga.
I totonu ole potu aoga ile isi aso, na ou mafaufau ai lava i se auala e avea ai a’u ma lima taumatau a si o’u tama, ta lelava vaai atu ua taoto i se ma’i tigaina. Ua maua le tonu ma ua ou filifili e faamaamulu o’u moemitiga uma sa iai ile fia avea ai o a’u ma faiaoga ile lumanai, ae sei o’u asuasu ipuvai e tali ai le galala o si o’u tama mai ile mamafatu ole fatuaiga.
E lei uma la’u tausaga ono ile aoga ae ou nofo loa e vaai si o’u tei pepe. Ole loto lava o si o’u tamā na ia finau mai ai ou te toe fo’i ile aoga ina ia fiafia lo’u lumana’i. E lei faigofie i si o’u tamā ona taofiofi le maligi o ona loimata ina ua ou tago atu i lona lima ma a’u upu nei, “Tamā e, e leo le tele o mea ma le maua o se galuega lelei le uiga ole upu lumanai manuia. Ole mativa fesagai ma le feofoofota’i o lima o se aiga e tausoa le mamafa ole avega e totō ai le mafanafana i o tatou loto”.
Tusa lava pe na ou iloa ou te laititi, ae na sili ona loloto lo’u alofa i si o’u tamā. O aso uma la i lo matou aiga, e ala usu si o’u tamā ile ma’umaga, ae o’u usu ile umukuka e faapupuna se vaivela auā se laumoli a si o’u tuagane. E nafa lava a’u ma le pepe, tagamea, asiasiga, togalaau, tapenaina ole fale ma fesoasoani ile gaseseina o meaai mo matua o lo’u tina.
Ua mavae tausaga e tele ma ua tupu malosi lo’u tuagane o Pili, ae ua fai ane le soifua o si o ma tamā. Ole 15 o o’u tausaga, na ou saili galuega ai ile faletalimalo oloo tu i lo matou nuu, e tulei ai le aoga a si o’u tuagane ma sei tausi ai si o’u tamā. Na maua la’u galuega, ou te kilini ile lotoa atoa ole faletalimalo. Ua ou masani lava la ile alapo e tapena Pili ile aoga, fai se iputi ma si o’u tamā ma matua o lo’u tina, ona alu loa lea o la’u foleni pei lava ole teine e vaaia le aufaigaluega a le faletalimalo.
A oo ina ou manava i afiafi, ona ou alu lea nao a’u ile ma’umaga e fafai mai ni talo mo se faafiafiaga ole afiafi, ae nofo si o’u tei e vaai si o’u tamā. Ua pei lava a’u ole isi taulealea. O Aso Toonai uma ou te alu ai ile faatoaga e toto tiapula e pei ona a’o mai e lo’u tamā ia te a’u. Matou te taliē lava ma le ‘oso ma lauvai ile mugala poo le tau timuga foi. Tusa poo le a le mamafa o galuega, e matuai leai lava ma ni lagona lelava e oo mai talu le manumalo ole alofa ile aiga.
Ua faasolo pea le olaga, ua siitia lo’u tulaga ile faletalimalo. Ua avea a’u ma talitelefoni a le faletalimalo. Ona o lo’u faamaoni I la’u galuega, na filifili ai le alii pule ole faletalimalo olea ia faia lo matou falepalagi matou te nonofo ai ma si o’u tamā ma si o’u tuagane, talu le faamalieina o ia i lo’u faamaoni I a’u galuega . Ae ole taimi foi lea, ua alualu lava i luma taumafaiga a si o’u tuagane ile aoga.
E pese leotele le faigalotu a lo matou aiga ile tasi afiafi ae tagi tautala si o’u tamā ma taumafai mai se upu, “Si o’u afafine, faamagalo a’u ile le mafai ona tuuina atu o oe i aoaoga mo sou lumanai. Faafetai I lo’u loto alofa ia te au ma si ou tuagane ua ala ai lava ona e faletua I aoaoga E le faigofie mo a’u peitai, e faafetaia le Atua o manuia auā ua avea lava oe ma faamalosiau ia te a’u, lea foi ua ala mai ai manuia i si o tatou aiga”
O o’u loimata na maligi ma faapea atu a’u musumusuga, “Tamā, tuagane, e leo so’u valaauina lo’u tulituliloa o so’u manuia. O lo’u valaauina, ole faamaopopo o lo’u aiga, ofo atu le alofa faatina i si o’u tuagane, ave atu se mafanafana o lima faatuafafine, ae sili ai, ole avea ma ou lima taumatau. E lei i’u lelei ni aoaoga, ae ua faamanuia mai le Atua ona ole alofa ua taula ile fatuaiga
