O le lē uma o la’u aoga na fai ai lava ma lo’u toalua ile faatoa 18 o o’u tausaga. O inuga lava a taulele’a i po o Aso Faraile uma na faamalolosi atu ai lava ma a’u pepa ile teine lalelei, le afafine ole taitai aumaga e ana le faleoloa lea matou te inu soo ai.
Ai lava ole mea tonu lea e ta’u ole laki. Auā o ai lava a’u olea fia fai mai ai se manatu o se teine momosi foliga ma atamai?
A’e, e le’i tuumamaina foi e le similī ale tama faima’umaga.
O Sui le igoa o si o’u toalua.
Na uma loa ona faapaia i ma’ua ile i la’u ekalesia, ma filifili loa ma te o i lo’u aiga ma te nonofo ai ma tausi si o’u tinā auā na’o i ma’ua lo ma aiga, ae o Sui e toatolu ona uso oloo i Samoa, 5 ona tuagane oloo i atunuu mamao, ma e malosi le aiga auā e maualiga foi le tulaga o lona tina ile ofisa a le Palemia.
I le popofou lava faatoa ma oo i lo’u aiga, se pei lava a’u o se tama milionea.
Ua le toe vaaia e le nuu ni ofuvae tipitipi ma ni mitiafu gamuasua lea e masani ona ou ofu ai, ae ua na’o lavalava fou lea ua ou siou atu ai nei.
Ai lava o tupe faasili ia ole faleoloa o si aiga lea ua fai ai nei a’u faiga.
E le gata ile na, ae na matuai fefete lo’u ulu pei ole polofesa auā ua ou mimita lava ua o ma nonofo ma Sui, ae toeitiiti tama uma ole nuu e fia uo iai. Na gasolo lelei mea uma ile masina muamua.
Ma te alapopö lava ma si o’u toalua e fai se mālū taeao a si o’u tina, ona ou alu ai lea i galuega a le nuu ae faamuli atu Sui ma le loomatua ile fale.
Na lilo i o’u manatu se mea olea tupu. I afiafi uma lava ou te fo’i mai ai ile fale, e faimai lava lo’u tinā ia te a’u, “Se matua’i e leaga tele lou alu ae tiai a’u.” O a’u la lenei ua ou oso atu, “Mom, o a na tala faapena, o na te lua nonofo ma Sui, o a’u lava fo’i lena.”
E leai se tala a Sui, ae ua na’o le lulu ole ulu o si loomatua ma foliga e pei e faanoanoa lava. Na ou faapea lava, ai lava ua misia a’u e si o’u tina ile aso atoa.
Ua laulau atu nei le meaai, ma o’u vaai atu, faatoa tamiami lava lea o lo’u tina pei o se tagata ua leva ona mole manava ile aso atoa.
Ua ou faiatu nei ia Sui, “Na fai se lua meaai ile nei aso?” Ae ua vave lava le tali mai a Sui, “Ioe, ole aiga lona tolu ai lea ole nei aso.”
Talu ona ma nonofo ma Sui, e lei maua lava se ma tama. Ua fia fofö, fia vai ua faainu, ae ua fia foi ni tatalo e talosia ai le ma ulugalii, ua leva ona ou fia siia so ta afafige poo sota atalii ma avea a’u o se tamā.
I le taeao po lava ole Sapati, na ou faiatu ai ia Sui, e nofo ia i luga e tapena se suātī a le loomatua ae lei usu ile tapuaiga. Na matua’i faateia lava a’u ile sa’eā mai o lo’u toalua ia te a’u, “Vaai, sei kau kuu mai se kaimi ou ke kau magava age ai.
Vaiaso akoa gao le aiai o lou kigā e le kaikai sau e fesoasoagi mai i se feau ae laa koe aluaku foi ma le gei aso, se kau fai ma se alofa.”
O si o’u tinā lenei ua nofotatā ane i luga ma le tātāvale ole fatu poo le a le mea ua tupu. O a’u lava foi lenei ua lē lagona so’u leo ae ua ou alu gūgū e fai le meaai ole Aso Sa.
Ua tuua nei sauniga afiafi ma ua feau mai nei i ma’ua e lo’u tina mo se matou talanoaga. Ua o ma saofafa’i atu nei i lalo ona faapea mai lea o si ole loomatua,
“Ia lelei ua lua omai. Ua le saoloto lenei Sapati ile taia o la’u faalogo ile le fiafia o oe Sui…”
E lei uma mai le tala a si loomatua ae ua oso atu Sui, “le fiafia ile a? Ua ou lelava pologa ile kou aiga makikiva e kausi mai lava oe ile isi Aso Gafua e oo ile isi Aso Gafua, uma mai kupe a o’u makua e kausi ai le kou aiga ae leai ma seisi sei fesoasoagi mai i se feau. Sili pe a kaakia lau makaupu lega.”
Ua ou faamalulu nei isi o’u tina ua nao loimata. Faapea lo’u mafaufau, ai ole mea lea e foliga fāatu ai si o’u tina pe a ou alu ese ma le fale.
Ai foi ole mea lea e tupu i aso uma.
Masalo ole ala tonu lea ole le maua o se ma tama, ta lelava faasaga i ni malaia ona o lo’u toalua. Ua ou tomanatu, ua sese la’u filifiliga. Ua ou seetia ile mālū ole tai taeao.
Ai ona o le lalelei ma le tupe na mafua ai ona ou faamemelo ia Sui, ae nanā ai le leiloa ava si o’u tina. Ua avea nei ma avega mamafa le va o lo’u tina ma lo’u toalua.
Ua mavae nai masina, ua manuia si o’u toalua ma ua ma’itaga.
O le aoauli ole Aso Lulu a’o o’u sasa vao i tua ane ole matou fale, na ou faalogoina ai se vāvāö mai i lo matou fale. Ou te momo’e atu, o lo’u tina lea e faataitaiö ua togi tutu’i lava e Sui ile ripoti mata’eta’e, faimai ua tiga ona taliga ile ote a le loomatua.
Ae nana ai lana tautua pa’ö ma le tomumu na ala ai ona ote le loomatua. O lo’u tinā, poo le a le lē ava o lo’u toalua, e toeafe lava pa’ū mai se upu faamalaia i lona fofoga ona ole malosi ole alofa faamatua.
Ae o a’u foi, ou te onosai pea i amioga a Sui tusa poo pe a le tiga ona e le gata oloo maitaga, ae na a’oa’oina a’u e lo’u tinā mai i lo’u itiiti, e sa ona pa’i lo’u lima i se tamaitai. Ae ua avea lava foi lea ma mafuaaga ole faifaitetele ai o amioga lē migao a lenei fafine i si o’u tina.
Ua oo nei ile masina e ola ai Sui ma ua faatīgā ile po.
E pei ua oo ile lagi lo’u fiafia, ua tuai lava ona ou faalogo atu i se leo o se pepe o tagi mai. Ua aami nei Losa le faatosaga a le Nuu.
Pe atoa le 5 itula o faatiga, e lei mafai lava ona fanau lo’u toalua, ae ua ese lava foi le vaaiga ua ou vaaia.
Ua na’o le vili tiga, ae ua le mafai ona gagana mai. O a’u lenei ua oso lo’u popole ma ua ou nanati atu loa i lo’u tinā e tatau ona ave Sui ile falema’i nei tupu se pefea.
E oo atu ile falema’i, ua vaaia tulaga faletonu. Ua le mafai ona nofo lelei. O a’u lenei ua ou soso atu ma milimili lona tua, faainu le vai, peitai ua solovī ane lava i luga ole moega ma faufauee. Ua tamomoe mai fomai ma faia gaoioiga, ae ave i ma’ua ma lo’u tina i fafo.
Ou te faalogo atu lava mai ile potu na o ma faatalitali ai, oloo leotele mai le faataitaiö a si o’u toalua, ae ua le mapu a ma talosaga ma si o’u tina. Ua fai sina umi ona mou atu le leo, ae savali mai loa le fomai.
“O oe lea ole toalua o Sui?”…..”Ioe o a’u lea. Ua ola si o’u toalua fmolemole?”
Pei lava e fofo’e ese atu e seisi le fiafia ma a’u ina ua faapea mai le fomai, “Ia e loto tele, na o matou taumafai ile mea e gata ai le mafai, ae ua tuai, ua faigata ma ua le mafai ona fanau si ou toalua, ua tulaga faaletonu lava, o lea, ua le mafai ona laveaiina lona ola, ma ua malaia foi si ana tama”.
Na’o loimata ma le maoga ane o la’u tagimasūsū, pei o se tui ua tutui ai lo’u fatu, le faamoemoe ma le tulimata’i efia afisi i se tamaititi ua lē taulau.
Ua ou faasaga atu nei ile Atua ma ou sa’i atu iai, pagā ua tū mai lava i o’u luma amioga a lo’u toalua e faia i lo’u tinā, ma ua ou faapea ifo ai? Pe leo le mafuaaga ea lenei?
