E le’o le aufaigaluega a soo se ofisa latou te mua’i faafeiloa’iina paaga oloo faaaogaina le auaunaga, ae o fafo, ma le anofale o le ofisa.
I le tautua a le Faletupe o Tagatanuu o Samoa, le Samoa National Bank of Samoa, o le a le toe fe’oma’i le atunuu e afea le lala i Vaitele ona o le pumo’omo’o o le ofisa, aua o lea ua maea faalautele ma tulai mai o se siosiomaga sili ona mautu.
E talitonu le Pulega a le Faletupe, a lelei le faatotogaina o nofoaga oloo ofoina ai le auaunaga, e faigofie foi ona faaosofia le toatele o tagata e afea.
Na saunoa Peseta Peter Tone, o ia lea oloo tauavea tiute Faaofisa Sili Lagolago mo le taimi nei,
“O manaoga o a matou paaga, matou te faamuamua.
“Matou te iloa lelei e manaomia e le anoanoa’i o nai tagata e afea le ofisa i Vaitele se avanoa tele e ofi uma ai, ae le gata i lea o le toe faaopopo ai o tagata faigaluega i lea lala e tali i manaoga o le atunuu.”
E tolu vaiaso na faagasolo ai galuega toe faaleleia, ae peitai e lei taofia ai le ofoina o le auaunaga, aua sa faaaoga lava taavale (vans) e lua a le Faletupe lea e mafai ona faatinoina aii luga ana auaunaga oloo ofoina foi i le ofisa autu i le taulaga.
E le gata ua faaleleia le ofisa, ae ua sili ona siitia maualuga le tulaga o le faatinoina o le auaunaga e alii ma tamaitai ofisa, e ala i tomai faapitoa.
O nei vaega uma, e mo le unaia o se tautua faamalie loto mo Samoa, aua o le Faletupe lenei, o le Faletupe a o tatou lava tagatanuu.
